بقلم / سهام أحمد

من و إحنا صغيرين في الابتدائية كان المدرسين يعلمونا إن أصل كل شيء في الكون هو القانون : هو اللي ينظم ويعدل وهو اللي يكافئ ويعاقب. كنا لما نعمل حاجة كويسة نتكافى ولمانغلط نتعاقب ونضرب وكانت حياتنا كلها على كده في البيت أبائنا هما رجال القانون وفي المدرسة كان المدرس أوالناظر هواللي شايل الدور.

كبرنا و بدأنا نشوف الوش الثاني من الدنيا اللي كان مخفي علينا شفنا ناس بتنام تحت الكباري في عز البرد والشتاء وتلاقي السيارات الفخمة معدية جنبهم أصحابها مدفيين ومشغلين الكاست على أنغام دافئة رايحين جري على بيوتهم "الفايف ستارز"

عدينا الشارع و لقينا يافطة كبيرة  عليها ملحوظة . تمهل وأنت تسوق.. إمضاء أصدقاء الطريق ده كلام كويس ومطلوب بس يا ترى بيطبق على مين ما هو في النهاية قانون برده بيحكم وبينظم السير .

يااااااااااااه بعد اليوم الطويل ده بنرجع لبيتنا عشنا الصغير المنتظم واللي لسة بتحكمه نفس القوانين اللي فتحنا عنينا عليها  ساعة الاكل الكل لازم يكون موجود ويوم الجمعه يوم مقدس علشان بنروح نزور تيتة واعمامي ….لسة دستور البيت هو هو متغيرش ومتعدلش بقاله اكثر من عشرين سنة

متجمعين على صينية الشاي والسوداني بنفتح التلفزيون نشوفلنا فيلم ولا حاجة تسلينا و تنسينا اللي شوفناه لكن هيهات !! …مفيش !!مفيش غير مسلسل واحد بيتذاع كل يوم هما نفس الممثلين وكل يوم بيعرضولنا قصة جديدة عاملين زي السيتكومات الرمضانية …..المسلسل اسمه رجال فوق القانون!..ناس بتموت وناس بتموت فيها وهي بتضحك…..ناس بتضيع وناس بتتفرج عليها ولا حد بيتاثر كله ساكن وبيتفرج ده اذا مكانش ليه يد في اللي بيحصل …فين القانون اللي اتعلمناه من كل ده ؟ فين الميثاق والدساتير ؟؟ فين احنا من كل ده ؟؟؟ وليه بيحصل كل ده ؟ انا مش بوجه كلامي للاسلام او للمسيحية او أي اديان سماوية ولا وضعية

انا سؤالي للانسانية ولا ده كمان تاهت بين مواد القانون ولا يمكن دفنها رجال فوق القانون…